ಮೋದಕಪ್ರಿಯ ಗಣಪನೇ

ಗಣಪತಿಸ್ತುತಿ - ೧

ರಚನೆ: ದಿವಾಣ ದುರ್ಗಾಪ್ರಸಾದ್ ಭಟ್
ಯಮುನಾಕಲ್ಯಾಣಿ - ತ್ರಿವುಡೆತಾಳ
ರಾಗ: ಸಿಂಧೂಭೈರವಿ

ನೀಡು ಸನ್ಮತಿ ದೇವಗಣಪತಿ

ಬೇಡುವೆನು ವರದಾತನೇ

ಮಾಡುತಾರ್ಚನೆ ನಿನ್ನ ಸೇವನೆ

ಪಾಡುವೆನು ಗಜವದನನೇ ||

ಏಕದಂತನೆ ವಕ್ರತುಂಡನೆ

ಸ್ವೀಕರಿಸು ನೈವೇದ್ಯವಾ

ಪಾಕಭಕ್ಷ್ಯಗಳನ್ನು ಭುಂಜಿಸಿ

ಲೋಕವನು ಪೊರೆ ಬಾಂಧವಾ ||

ಭಾವರಾಗದಿ ಭಜಿಪೆನನುದಿನ

ದೇವವಂದ್ಯನೆ ಹರಸು ಬಾ

ಹೂವಮಾಲೆಯ ಸಿಂಗರಿಸುತಲಿ

ಸೇವೆಗೈವೆನು ಸಲಹು ಬಾ ||

ಆದಿಪೂಜಿತ ವಿಘ್ನನಾಶಕ

ಮೋದಕಪ್ರಿಯ ಗಣಪನೇ

ವೇದಮೂರುತಿ ನಾದಕೀರುತಿ

ಖೇದವನು ಕಳೆ ದೇವನೇ ||

ಭುವನಪತಿ ಗಜವಕ್ತ್ರರೂಪನೆ

ಬವಣೆಯನು ಕಳೆ ಸುಮುಖನೇ

ಪವಣಿಸುವ ಶ್ರೀಸುತನ ಭಕುತಿಗೆ

ಅವತರಿಸಿ ಬಾ ಸುಗುಣನೇ ||

-ಶ್ರೀಸುತ

ಚಿತ್ರಕಲೆ: ಗಣೇಶ ಆಚಾರ್ಯ ಗುಂಪಲಾಜೆ

ನಿಮ್ಮ ಅನಿಸಿಕೆಗಳು ಅತ್ಯಮೂಲ್ಯವಾಗಿದ್ದು ಅಭಿಪ್ರಾಯಗಳನ್ನು Comment Box ನಲ್ಲಿ ಬರೆದು ಪ್ರೋತ್ಸಾಹಿಸಿ. Do not spam.

Pages