'ಗೆಳೆತನದ ಯಜ್ಞಕ್ಕೆ ತುಪ್ಪ...  ದ್ವೇಷದ ಬೆಂಕಿಗೆ ಬೆಣ್ಣೆ...' ತುಪ್ಪ ಹಾಗೂ ಬೆಣ್ಣೆ ಒಂದರ ಸ್ವರೂಪ ಮತ್ತೊಂದು; ಆದರೂ ಗುಣದಲ್ಲಿ ಅಲ್ಪಸ್ವಲ್ಪ ವ್ಯತ್ಯಾಸ.

        ಹೌದು... ಅವೆರಡೂ ಲೇಖನಿಯ ನವಿರಾದ ಸ್ನೇಹಿತರಾಗಬಹುದು. ನಿನ್ನ ಬಗ್ಗೆ ನೀನೇ ಬರೆಯ ಹೊರಟರೆ ಅಥವಾ ನಿನ್ನ ಬಗ್ಗೆ ಇನ್ನೊಬ್ಬರು ಒಳ್ಳೆಯದನ್ನು ಬರೆಯಲು ಹೊರಟರೆ ನೀನು ಗೆಳೆತನದ ಯಜ್ಞಕ್ಕೆ ತುಪ್ಪವಾಗುವೇ... ಅದೇ ರೀತಿ ನಿನ್ನ ಬಗ್ಗೆ ಬೇರೆಯವರು ಖಂಡಿಸಿ ಬರೆದರೆ ನೀನು ದ್ವೇಷದ ಬೆಂಕಿಗೆ ಬೆಣ್ಣೆ ಸವರುವೆ. ಬರೆಯುವವ ಯಾರಾದರೇನು? ಬರೆಯುವುದು ಲೇಖನಿಯ ಅಂದರೆ ನಿನ್ನ ಮೂಲಕವೇ ತಾನೆ? ಹೇಳುವವನು ಒಬ್ಬನಾದರೇನು, ಕೀರ್ತಿ ಪಸರಿಸುವಲ್ಲಿ ಲೇಖನಿಯ ಪಾತ್ರವೇ ಹೆಚ್ಚು ತಾನೇ?

          ಪ್ರಪಂಚದಲ್ಲಿಂದು ಖಡ್ಗ ಹಿಡಿದು ಯುದ್ಧಕ್ಕೆ ನಿಂತ ಕೈಗಳು ಕ್ರಾಂತಿಯನ್ನೇ ಮಾಡಿದ್ದರೂ ಸಹ ಖಡ್ಗ ಹಿಡಿದು ಯುದ್ಧಕ್ಕೆ ನಿಂತ ಕೈಯನ್ನು ಲೋಕಕ್ಕೆ ಪರಿಚಯಿಸಿದ್ದು ಲೇಖನಿ ಹಿಡಿದ ಕೈಗಳೇ ಹೊರತು ಖಡ್ಗ ಹಿಡಿದು ಕೈಚಳಕ ತೋರಿದ ಕೈಗಳಲ್ಲ. ಬಾಯಲ್ಲೇ ಪ್ರಚಾರವಾಗಬಹುದಾದ ವಿಷಯವಾದರೂ ಸಹ ಮುಂದಿನ ಪೀಳಿಗೆಗೆ ತಿಳಿಸಲು ಪುಟ್ಟ ಸಹಾಯ ಮಾಡಿ ದೊಡ್ಡ ಸುದ್ಧಿಯಾಗುವಂತೆ ಮಾಡಿದ್ದು ಲೇಖನಿಯೇ ಸರಿ!!!

          ಕಲಾವಿದನ(ಚಿತ್ರಕಾರನ) ಕುಂಚದಲ್ಲರಳುವ ವಿಷಯಕ್ಕೆ, ನೈಜತೆಗೆ ಜೀವ ತಂದೊಡ್ಡುವ ಲೇಖನಿಯ ವಿಧ ಒಂದಾದರೆ, ದೇಶದ ಆಗುಹೋಗುಗಳನ್ನು ಸಮಾಜಕ್ಕೆ ತಿಳಿಯಪಡಿಸುವ ಲೇಖನಿ ಮಗದೊಂದು. ವಿದ್ಯಾರ್ಥಿಯ ಜ್ಞಾನ ಮಟ್ಟವನ್ನಳೆಯುವ ಪರೀಕ್ಷೆ ಎಂಬ ಪ್ರಯೋಗಕ್ಕೆ ಸಹಾಯ ಮಾಡುವ ಲೇಖನಿ ಮತ್ತೊಂದು... ಒಟ್ಟಿನಲ್ಲಿ ವಿಜ್ಞಾನ ತಂತ್ರಜ್ಞಾನ ಎಷ್ಟೇ ಮುಂದುವರೆದಿದ್ದರೂ ಒಬ್ಬನಿಂದ ಮತ್ತೊಬ್ಬ ಏನೇ ಪಡೆದುಕೊಂಡ್ಡದ್ದರ ಒಪ್ಪಿಗೆಗಾಗಿ ಅಥವಾ ಖಾತರಿಗಾಗಿ ಬೆರಳಚ್ಚಿನಷ್ಟೇ ಪ್ರಮುಖ ಸ್ಥಾನವನ್ನು ಹೊಂದಿರುವ ಸಹಿಯನ್ನು ತೆಗೆದುಕೊಳ್ಳಲು ಸಹಾಯ ಮಾಡುವುದು ಲೇಖನಿಯೇ ಸರಿ...

          ಕಾಲಘಟ್ಟದಲ್ಲಿ ಬದಲಾವಣೆ ಹೊಂದುವ ಪಾತ್ರವರ್ಗದ ಆಗುಹೋಗುಗಳನ್ನು ತಿಳಿಸುತ್ತಿದ್ದ ಪತ್ರಕ್ಕೆ ಬೆನ್ನೆಲುಬಾಗಿ ಬಂದ ಲೇಖನಿಯು ಇಂದು ಎಲ್ಲರ ಮನೆ ಮನದ ಬಂಧು ಲೇಖನಿ ಎಂದರೆ ತಪ್ಪಾಗಲಿಕ್ಕಿಲ್ಲ. ಕಾರಣ, ಮಾರುದ್ದದ ಸುಃಖ-ದುಃಖ ಚೆಲ್ಲುವ ಲೇಖನಿಗೂ, ಒಂದು ದೇಶದ ಚಿತ್ರಣವನ್ನು ಕ್ಷಣ ಮಾತ್ರದ ಸಹಿಯಲ್ಲಿ ಬದಲಾಯಿಸುವ ಲೇಖನಿಗೂ ಹೆಚ್ಚೇನು ವ್ಯತ್ಯಾಸವಿಲ್ಲ. ಎರಡೂ ಹೃದಯಕ್ಕೆ, ಜೀವಕ್ಕೆ ತಟ್ಟುವ ಒಂದೇ ನಾಣ್ಯದ ಎರಡು ಮುಖಗಳಿದ್ದಂತೆ.

          ಇಂದು ಪ್ರಪಂಚದಲ್ಲಿ ಪ್ರತಿಯೊಂದು ವಸ್ತು ವಿಷಯಕ್ಕೆ ತನ್ನದೇ ಆದ ಸ್ಥಾನಮಾನ ಗೌರವ ಇದೆ. ಅಂತೆಯೇ, ಸರಿ ಇದ್ದರೆ ನಯವಾದ ಬರಹದಲ್ಲಿ, ಮಿಥ್ಯವಾದರೆ ಕೊಂಚ ಖಾರವಾದ ಬರಹದಲ್ಲಿ ತಿದ್ದಿ ತೀಡುವ, ದೇಶದ ಚಿತ್ರಣವನ್ನೇ ಬದಲಿಸುವ ತಾಕತ್ತಿರುವ, ಒಬ್ಬ ವ್ಯಕ್ತಿಯ ಭವಿಷ್ಯವನ್ನು ಅತ್ಯುತ್ತಮ ರೀತಿಯಲ್ಲಿ ಬೆಳಗಿಸುವ ಸಾಮರ್ಥ್ಯ ಇರುವ, ದೇಶದಲ್ಲಾಗುವ ಪ್ರತಿಯೊಂದು ಕೆಲಸದ ಹೊಸ ಸಂಚಯನಕ್ಕೆ ನಾಂದಿ ಹಾಡುವ ಓ ಲೇಖನಿಯೇ... ನಿನಗೆ ನನ್ನ ನಮನ.