ವರ್ಷಧಾರೆ


ಇಳೆಗಿಳಿಯಿತು
ವರ್ಷಧಾರೆ
ಕೊಳೆಯನೆಲ್ಲಾ ಕಳೆಯಿತು |
ಕಳೆಗುಂದಿದ
ಮರಗಿಡಗಳ
ಮಳೆಹನಿ ಸಂತೈಸಿತು ||

ಮೋಹದಿಂದ
ಜಾರಿಬಂದು
ನದಿಮೂಲವನರಸಿತು |
ಬತ್ತಿ ಹೋದ
ಹೊಳೆಗಳೆಲ್ಲ
ಜುಳು ಜುಳು ದನಿ ಮಾಡಿತು ||

ಭೂಮಿಯೊಳಗೆ
ಕುದಿಯುತಿದ್ದ
ಜ್ವಾಲೆಯನ್ನು ತಣಿಸಿತು |
ಜ್ವಲಿಸುತಿದ್ದ
ರವಿತಾಪವ
ಕರುಣೆ ತೋರಿ ಇಳಿಸಿತು ||

ಬಯಲಿನಲ್ಲಿ
ಪ್ರಾಣಿಪಕ್ಷಿ
ನೀರ ಕೊಳವ ಪಡೆಯಿತು |
ಸುಡುಬಿಸಿಲಿನ
ಒತ್ತಡವನು
ತೊರೆದು ನಲಿದಾಡಿತು ||

ನೆಲದ ಮೇಲೆ
ಹಚ್ಚ ಹಸುರು
ಹೊದಿಕೆಯಂತೆ ಹಬ್ಬಿತು |
ಜೀವಿಗಳ
ಕಣ್ಣುಗಳು
ತಂಪುಗೊಂಡು ನಲಿಯಿತು ||

ವರ್ಷಧಾರೆ
ಇಳೆಗದುವೆ
ಜೀವ ಕೊಡುತ ಹಾಡಿತು |
ವೈಭವದ
ಮೆರವಣಿಗೆ
ಪ್ರಕೃತಿಯಲಿ ನಡೆಯಿತು ||


-ಶ್ರೀಸುತ

Photo Credit: Farms


2016 ರ ಯುಗಪುರುಷ ದೀಪಾವಳಿ ವಿಶೇಷಾಂಕದಲ್ಲಿ ಪ್ರಕಟಗೊಂಡ ಕವಿತೆ.

Please share and support me

2 comments:

  1. ಚೆಂದದ ಕವಿತೆ :)

    ReplyDelete
    Replies
    1. ಧನ್ಯವಾದಗಳು... to anonymous

      Delete

ನಿಮ್ಮ ಅನಿಸಿಕೆಗಳು ಅತ್ಯಮೂಲ್ಯವಾಗಿದ್ದು ಅಭಿಪ್ರಾಯಗಳನ್ನು Comment Box ನಲ್ಲಿ ಬರೆದು ಪ್ರೋತ್ಸಾಹಿಸಿ. Do not spam.