ಚಿತ್ರಕವನ ೧:

ಓ ಮುದ್ದು ಕಂದನೇ
ಅಮ್ಮ ಎಲ್ಲೆಂದು ನೀ
ಕೇಳಬೇಡ ನನ್ನ.
ನನ್ನ ಕಣ್ಣಲ್ಲಿ ಕಣ್ಣಿಟ್ಟು
ಹೃದಯಕ್ಕೆ ಕಿವಿಯಾನಿಸಿ
ಮನಸೊಳಗೆ ಬೆರೆತು
ನೋಡು ಕಾಣುವೆ ಅಲ್ಲೆಲ್ಲ
ಪ್ರತಿಕ್ಷಣವು ನಿನ್ನ ಕರೆಗೆ
ಓಗೊಡುವ ಅಮ್ಮನನ್ನ.
ಅಪ್ಪನಾದರೇನು ನಾನು
ಕೊಡಬಲ್ಲೆ ಅಮ್ಮನ ಪ್ರೀತಿಯ
ಈ ನನ್ನ ಮಡಿಲಲ್ಲಿ.
ಕೈತುತ್ತು ಕೊಟ್ಟು ಲಾಲಿ ಹಾಡುತ
ಮಲಗಿಸುವೆ ನಾ ಕಥೆಯೊಂದ ಹೇಳಿ.
ಕೈಯೊಳಗೆ ಬಲವಿರುವ ತನಕ
ದುಡಿಯುವೆನು ನಿನಗಾಗಿ
ಕಣ್ಣೀರು ಚಿಂತೆಯನು ತೊರೆದು
ಕಲಿತು ವಿದ್ಯಾವಂತನಾಗು ಕಂದ.
ಪುಟಿದು ಮುನುಗ್ಗಿ ಬರಬೇಕು
ಹಿಡಿದಿರುವ ಚೆಂಡಿನಂತೆ
ತೊಡೆಯಬೇಕು ಹಿಂಸೆ
ಅನ್ಯಾಯ ಅತ್ಯಾಚಾರಗಳ.
ಸೋಲುಗೆಲುವುಗಳು
ಬಾಳ ಗೆಳೆಯರು ನಮಗೆ
ಪರಿಹಾಸ ಚುಚ್ಚು ಮಾತುಗಳ
ಕಡೆಗಣಿಸಿ ನಡೆ ಮುಂದೆ
ಅಂಜದೆ ಅಳುಕದೆ  ಎದ್ದೇಳು
ನೀ ವೀರ ಯೋಧನಂತೆ.
ನಿನಗಾಗಿ ನಾ ಬದುಕ ಸವೆಸುವೆ
ಬದುಕು ನೀ ಮಾತೃಭೂಮಿಗಾಗಿ
ಮಾಡು ನೀ ಸೇವೆ ಭೂಮಿತಾಯಿಗಾಗಿ
ಅದು ಹೆತ್ತವರಿಗೆ ನೀನೀಯುವ ಉಡುಗೊರೆ.

                                       -ಅನ್ನಪೂರ್ಣ, ಬೆಜಪ್ಪೆ