■ ಚಿಟ್ಟಾಣಿ ರಾಮಚಂದ್ರ ಹೆಗಡೆ

ರಂಗದ ನೇಪಥ್ಯಕ್ಕೆ ಹೆಜ್ಜೆ ಹಾಕಿದ ಯಕ್ಷಮಣಿ...

        ಹೌದು... ಚಿಟ್ಟಾಣಿ ಎಂಬ ಹೆಸರು ಕೇಳಿದೊಡನೆ ಮನದೊಳಗೆ ಎದ್ದು ಬರುವ ನಗುಮೊಗದ ವ್ಯಕ್ತಿ "ಚಿಟ್ಟಾಣಿ ರಾಮಚಂದ್ರ ಹೆಗಡೆ"ಯವರು. ೧೪ ಸೆಪ್ಟೆಂಬರ್ ೧೯೩೫ ರಂದು ಉತ್ತರಕನ್ನಡ ಜಿಲ್ಲೆಯ ಹೊನ್ನಾವರ ತಾಲ್ಲೂಕಿನಲ್ಲಿ ಶ್ರೀ ಸುಬ್ರಾಯ ಈಶ್ವರ ಹೆಗಡೆ ಹಾಗೂ ಗಣಪಿ ಸುಬ್ರಾಯ ಹೆಗಡೆಯವರಿಗೆ ಮಗನಾಗಿ ಜನಿಸಿದ ಇವರು ತಮ್ಮ ವಿದ್ಯಾಭ್ಯಾಸವನ್ನು ೨ನೇ ತರಗತಿಗೆ ಕೊನೆಗೊಳಿಸಿ ಬಾಹ್ಯ ಲೋಕದ ಅಧ್ಯಯನದಲ್ಲಿ ತಮ್ಮನ್ನು ತೊಡಗಿಸಿಕೊಂಡವರು. ಸಣ್ಣ ವಯಸ್ಸಿನಲ್ಲಿಯೇ ಯಕ್ಷಗಾನ ಅಭಿರುಚಿಯಿದ್ದ ಚಿಟ್ಟಾಣಿಯವರಿಗೆ ಆಗಿನ ಹಿರಿಯ ಕಲಾವಿದರುಗಳೇ ಪ್ರೇರಣೆ. ಮುಂದಕ್ಕೆ ಬಾಳೆಗದ್ದೆ ರಾಮಕೃಷ್ಣ ಭಟ್ಟರಿಂದ ಯಕ್ಷಗಾನದ ಮೂಲಪಾಠವನ್ನರಿತ ಚಿಟ್ಟಾಣಿಯವರು ಕೊಂಡದಕುಳಿ, ಕೆರೆಮನೆ ಮುಂತಾದ ಕಲಾವಿದರುಗಳಿಂದ ಇನ್ನಷ್ಟು ಪ್ರೇರೇಪಣೆಗೊಂಡರು.ಈ ರೀತಿ ಯಕ್ಷಲೋಕಕ್ಕೆ
ಅಂದು ಒಬ್ಬ ಭೀಷಣನ ಪ್ರವೇಷವಾಯಿತು ಎಂದರೆ ತಪ್ಪಾಗಲಾರದು.


         ಚಿಕ್ಕ ಪ್ರಾಯದಲ್ಲೇ ಎಲ್ಲಿಲ್ಲದ ಗಾಂಭೀರ್ಯ ಚುರುಕುನಡೆಯನ್ನು ಹೊಂದಿದ್ದ ಚಿಟ್ಟಾಣಿಯವರು ತಮ್ಮ ೧೪ನೇ ವಯಸ್ಸಿನಲ್ಲಿ ಪ್ರಥಮಬಾರಿ ಶ್ರೀಕೃಷ್ಣ ಪಾರಿಜಾತ ಪ್ರಸಂಗದ ಅಗ್ನಿಯ ಪಾತ್ರವನ್ನು ಮಾಡಿ ರಂಗದಲ್ಲಿ ಸಂಚಲನ ಮೂಡಿಸಿದ್ದರು. ಅಲ್ಲಿಂದ ಹಚ್ಚಿದ ಜ್ವಾಲೆ ಇಂದಿನವರೆಗೂ ಉರಿಯುತ್ತಲೇ ಇತ್ತು ಎಂಬುದು ಅವರ ತೇಜಸ್ಸಿಗೆ ಹಿಡಿದ ಕನ್ನಡಿ. ಗುಂಡಬಾಳ, ಅಮೃತೇಶ್ವರೀ, ಸಾಲಿಗ್ರಾಮ, ಕೊಳಗಿಬೀಸ್, ಮೂರೂರು, ಮೂಡ್ಕಣಿ, ಪೆರ್ಡೂರು, ಇಡಗುಂಜಿ ಮೊದಲಾದ ಬಡಗುತಿಟ್ಟು ಯಕ್ಷಗಾನ ಮೇಳಗಳಲ್ಲಿ ಸುಮಾರು 68 ವರ್ಷಗಳ ಕಾಲ ಸತತ ರಂಗಸೇವೆಯನ್ನು ಮಾಡಿದರು. ಬಡಗುತಿಟ್ಟು ಯಕ್ಷಗಾನ ವಲಯದಲ್ಲಿ ಚಿಟ್ಟಾಣಿಯವರು ಚಿನ್ನದ ಮುಕುಟ. ಅವರ ನಗುವಿಗೆ ಇನ್ನೊಂದು ನಗುವಿನ ಸ್ಪರ್ಧೆಯಿಲ್ಲ. ಅವರ ಪಾದಚಲನೆಯ ಮೀರುವ ಇನ್ನೊಂದು ಚಲನವಲನವಿಲ್ಲ. ಅವರ ಭಾವಾಭಿವ್ಯಕ್ತಿಯ ಹೋಲುವ ಮತ್ತೊಂದು ಭಾವಭಂಗಿಯಿಲ್ಲ. ಒಟ್ಟಿನಲ್ಲಿ ಹೇಳಬೇಕೆಂದರೆ ಅವರ ರಂಗಪಯಣದಲ್ಲಿ ಅವರೆದುರು ಮತ್ತೊಬ್ಬರಿಲ್ಲ. ಅವರ ದುಷ್ಟಬುದ್ಧಿ, ಕೌರವ, ಕೀಚಕ, ರುದ್ರಕೋಪ, ಭಸ್ಮಾಸುರ, ಕಂಸ ಮೊದಲಾದ ಪಾತ್ರಗಳು ರಂಗದಲ್ಲಿ ಪರಕಾಯ ಪ್ರವೇಶ ಪಡೆಯುತ್ತಿದ್ದವು. ತನ್ನ ಇಳಿವಯಸ್ಸಿನಲ್ಲೂ ಭಸ್ಮಾಸುರನಾಗಿ ಮೈಗೆ ಭಸ್ಮ ಹಚ್ಚಿದರೆ ಅದೇ ೨೦ರ ಹರೆಯದ ಚುರುಕುತನ ರಂಗದಲ್ಲಿ ಎದ್ದು ನಿಲ್ಲುತ್ತಿತ್ತು. ಅದೇ ನಗು, ಅದೇ ಭಾವ, ಅದೇ ನೋಟ, ಅದೇ ಅಭಿನಯ.
ಭಾಗವತರ ಪದ್ಯದ ಲಯತಾಳಕ್ಕೆ-ಏರಿಳಿತಕ್ಕೆ ಚೊಕ್ಕದಾಗಿ ಪಾದವಿರಿಸುವ ಮೃದುನಾಟ್ಯ. ಇದರಿಂದಲೇ ಏನೋ... ಚಿಟ್ಟಾಣಿ ಶೈಲಿ ಎಂಬ ಶೈಲಿ ತನ್ನಿಂದ ತಾನೇ ಚಿಗುರೊಡೆಯಿತು.
         ಯಕ್ಷಗಾನದ ರಂಗವ್ಯತ್ಯಾಸದಲ್ಲಿ ಮೊದಲು ಕಾಣಿಸಿಕೊಳ್ಳುವುದು ತೆಂಕು ಹಾಗೂ ಬಡಗು ಎಂಬ ಒಂದೇ ನಾಣ್ಯದ ಎರಡು ಮುಖಗಳು. ಅರ್ಥ ಒಂದೇ ಆದರೂ ಶೈಲಿ ವಿಭಿನ್ನ. ತೆಂಕು ತಿಟ್ಟಿನ ದಿಗ್ಗಜರಲ್ಲಿ ಅನೇಕ ಮಂದಿ ತೆಂಕುಯಕ್ಷನಾಟ್ಯಕ್ಕೆ ತಮ್ಮ ಅತ್ಯಮೂಲ್ಯ ಕೊಡುಗೆಯನ್ನು ಕೊಟ್ಟವರಿದ್ದಾರೆ. ಅದೇ ರೀತಿ ಬಡಗುತಿಟ್ಟಿಗೆ ಮುಖ ಮಾಡಿ ನಿಂತಾಗ ಕೋಟ ಶಿವರಾಮ ಕಾರಂತ, ಕೆರೆಮನೆ ಶಿವರಾಮ ಹೆಗಡೆ, ಕೆರೆಮನೆ ಶಂಭು ಹೆಗಡೆ, ಕುಷ್ಟ ಗಾಣಿಗರು ಮೊದಲಾದವರು ಕಾಣಸಿಗುತ್ತಾರೆ. ಅದೇ ಸಾಲಿನಲ್ಲಿ ಇಂದು ಚಿಟ್ಟಾಣಿಯವರ ಹೆಸರು ತೇಲಲು ಕಾರಣ ಅವರ ಕಲೆಯ ಮೇಲಿನ ಅತೀವ ಪ್ರೀತಿ-ಅಭಿಮಾನ-ಶ್ರದ್ಧೆ ಹಾಗೂ ಭಕ್ತಿ. ತನ್ನ 82ನೇ ಇಳಿ ವಯಸ್ಸಿನಲ್ಲಿಯೂ ಗೆಜ್ಜೆ ಕಟ್ಟಿ ರಂಗವೇರಬೇಕೆಂದರೆ ಸಾಮಾನ್ಯರಿಂದ ಆಗುವಂಥದ್ದಲ್ಲ. ಹಾಗಾಗಿ ಚಿಟ್ಟಾಣಿಯವರು ಒಬ್ಬ ಅಸಾಮಾನ್ಯ ಕಲಾವಿದರಾಗಿದ್ದರು ಎಂಬುವುದರಲ್ಲಿ ಯಾವ ಸಂಶಯವೂ ಇಲ್ಲ. ಅವರ ವಿಶೇಷವಾದಂತಹ ನಾಟ್ಯಪ್ರಕಾರದಿಂದ ಯಕ್ಷಗಾನದ ಸ್ಟೈಲ್ ಕಿಂಗ್ ಎಂದೇ ಪ್ರಖ್ಯಾತರಾದವರು ಚಿಟ್ಟಾಣಿಯವರು.

          ಚಿಟ್ಟಾಣಿಯವರದು ಚೊಕ್ಕ ಸಂಸಾರ. ಪತ್ನಿ ಸುಶೀಲ ರಾಮಚಂದ್ರ ಹೆಗಡೆ ಹಾಗೂ ಮಕ್ಕಳಾದ ಲಲಿತಾ ಹೆಗಡೆ, ಸುಭ್ರಮಣ್ಯ ಹೆಗಡೆ, ನಾರಾಯಣ ಹೆಗಡೆ ಹಾಗೂ ನರಸಿಂಹ ಹೆಗಡೆಯವರನ್ನು ಕೂಡಿದ ಚೆಂದದ ಮನೆ. ತಮ್ಮ ಕಲಾಸೇವೆಯೊಂದಿಗೆ ಮನೆಯವರ ಪ್ರೋತ್ಸಾಹದ ನುಡಿಯೂ ಸೇರಿದ ಕಾರಣ ಅವರ ಈ ಕಲಾಪಯಣಕ್ಕೆ ಬಲ ಬಂದಿತ್ತು. ಸುಧೀರ್ಘ ಅವಧಿಯ ಕಲಾಸೇವೆಯಲ್ಲಿ ಚಿಟ್ಟಾಣಿಯವರು ಗಳಿಸಿದ ಬರುದು ಸಂಮಾನಗಳು ಸಾವಿರಕ್ಕೂ ಮಿಗಿಲು. ಮೊತ್ತಮೊದಲ ಬಾರಿಗೆ ಯಕ್ಷಗಾನ ಕಲಾವಿದನೊರ್ವ ರಾಷ್ಟ್ರದ ಪ್ರತಿಷ್ಠಿತ "ಪದಶ್ರೀ" ಪ್ರಶಸ್ತಿಗೆ ಭಾಜನರಾದ ಹೆಗ್ಗಳಿಕೆ ಚಿಟ್ಟಾಣಿಯವರದು. ಅದೇ ರೀತಿ ೧೯೯೧ರಲ್ಲಿ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ, ೨೦೦೪ರಲ್ಲಿ ಜನಪದಶ್ರೀ ಅವಾರ್ಡ್, ೨೦೧೩ರಲ್ಲಿ ಕೆರೆಮನೆ ಶಿವರಾಮ ಹೆಗಡೆ ಅವಾರ್ಡ್, ೨೦೦೯ರಲ್ಲಿ ಕರ್ಕಿ ವೆಂಕಟರಮಣ ಶಾಸ್ತ್ರೀ ಅವಾರ್ಡ್ ಹಾಗೂ ಆರ್ಯಭಟ್ ಅಂತರಾಷ್ಟ್ರೀಯ ಪ್ರಶಸ್ತಿಗಳನ್ನು ತಮ್ಮ ಮುಡಿಗೇರಿಸಿಕೊಂಡ ಧೀಮಂತ ಕಲಾಸಾಧಕ. ಯಕ್ಷಗಾನ ಕ್ಷೇತ್ರದಲ್ಲಿ ಭಾರತ ಹಾಗೂ ಹೊರದೇಶಗಳಲ್ಲಿ ಅತ್ಯಂತ ಹೆಚ್ಚು ಪ್ರದರ್ಶನ ನೀಡಿದ ಕಲಾವಿದ ಎಂಬ ಹೆಗ್ಗಳಿಕೆ ಚಿಟ್ಟಾಣಿಯವರದು. ಇವರು ತಮ್ಮ ಅತ್ಯಮೋಘ ನಾಟ್ಯವೈಖರಿಯ ಮೂಲಕ ಚಿಟ್ಟಾಣಿ ಶೈಲಿಯ ಹರಿಕಾರ ಎಂದೆನಿಸಿಕೊಂಡರು.

          ಕಣ್ಣ ಹುಬ್ಬೇರಿಸುವ ಇವರ ನಾಟ್ಯ ರಂಗದಲ್ಲಿ ಕೊನೆಯಾಯಿತು ಎಂಬುವುದು ಮನಸ್ಸಿಗೆ ಬಹಳಷ್ಟು ಬೇಸರ ತರುವ ವಿಷಯ. ದಿನಾಂಕ ೦೩ ಅಕ್ಟೋಬರ್ ೨೦೧೭ರಂದು ಶ್ರೀಯುತರು ಇಹಲೋಕವನ್ನು ತ್ಯಜಿಸಿದ್ದು ಅಪಾರ ಯಕ್ಷ ಅಭಿಮಾನಿಗಳನ್ನು ಅಗಲಿದ್ದಾರೆ. ಅವರ ಅಗಲಿಕೆ ಯಕ್ಷಲೋಕಕ್ಕೆ ತುಂಬಲಾರದ ನಷ್ಟ. ಶುದ್ಧ ನಾಟ್ಯ, ಯಕ್ಷಗಾನದ ಚೌಕಟ್ಟಿನೊಳಗೆ ತಮ್ಮ ಪಾತ್ರದ ಚಲನೆ, ಚೊಕ್ಕದಾದ ಅರ್ಥಗಾರಿಕೆ, ಸಾಂದರ್ಭಿಕ ಹಾಸ್ಯ ಹಾಗೂ ಯಾರದ್ದೂ ಮನನೋಯಿಸದಂತಹ ಮುಗ್ಧ ಭಾವ... ಇವೆಲ್ಲವೂ ಒಟ್ಟಾಗಿ ಸೇರಿ ಓರ್ವ ಚಿಟ್ಟಾಣಿ....

ಅಭಿಮಾನಿಗಳನ್ನು ಕಲೆಹಾಕುವುದು ಸುಲಭ. ಆದರೆ ಅದೇ ಅಭಿಮಾನಿಗಳನ್ನು ಸತತ 68 ವರ್ಷಗಳ ಕಾಲ ತನ್ನೊಂದಿಗೆ ಸಾಗಿಸುವುದು ಕಷ್ಟಸಾಧ್ಯ. ಈ ನಿಟ್ಟಿನಲ್ಲಿ ಚಿಟ್ಟಾಣಿಯವರದು ಎತ್ತಿದ ಕೈ. ಇದಕ್ಕೆಲ್ಲಾ ಕಾರಣ ಅವರ ಕಲಾಸೇವೆ. ನಿಷ್ಠೆ, ಪ್ರಾಮಾಣಿಕತೆಯಿಂದ ಮಾಡಿದ ಕಲಾಸೇವೆಗೆ ಜನರು ಅವರನ್ನು ಉತ್ತುಂಗದ ಶಿಖರದಲ್ಲಿಟ್ಟರು. ಇಂದು ಅದೇ ಶಿಖರವೇರಿ ಕುಳಿತ ಚಿಟ್ಟಾಣಿಯವರು ಅದೇ ಶಿಖರದಲ್ಲಿ ಯಕ್ಷಮಣಿಯಾಗಿ ನೆಲೆಯಾದರು. ಆ ಯಕ್ಷಮಣಿಯ ಹೊಳಪು ಮಾತ್ರ ಇನ್ನು ನಮ್ಮೊಂದಿಗೆ... ಅಗಲಿದ ದಿವ್ಯಚೇತನಕ್ಕೆ ಕಲಾಮಾತೆ ಶಾಂತಿಯನ್ನು ಕರುಣಿಸಲಿ ಎಂಬ ಪ್ರಾರ್ಥನೆಯೊಂದಿಗೆ ಯಕ್ಷಮಣಿ ಚಿಟ್ಟಾಣಿಯವರಿಗೆ ಈ ನನ್ನ ನುಡಿನಮನ...

                                                        -ಶ್ರೀಸುತ

■ ದಿವಾಣ ದುರ್ಗಾಪ್ರಸಾದ್ ಭಟ್ ಕಟೀಲು

"ಲೇಖನಕ್ಕೆ ವಿಷಯಗಳನ್ನು ಕಟೀಲು ಸಿತ್ಲ ರಂಗನಾಥ ರಾವ್ ಹಾಗೂ 'ಸಂಪದ' ಅಂತರ್ಜಾಲ ತಾಣದಿಂದ ಸ್ವೀಕರಿಸಲಾಗಿದೆ..."

ಚಿಟ್ಟಾಣಿ ರಾಮಚಂದ್ರ ಹೆಗಡೆಯವರ ಕುರಿತಾದ ಸಾಕ್ಷ್ಯಚಿತ್ರದ Youtube Link ಅನ್ನು ನೀಡಲಾಗಿದೆ. ವೀಕ್ಷಣೆಗೆ ಈ ಕೆಳಗಿನ ಲಿಂಕ್ ಗೆ ಭೇಟಿ ನೀಡಿ.
ಸಾಕ್ಷ್ಯಚಿತ್ರ ಮೂಲ: ಕಟೀಲು ಸಿತ್ಲ ರಂಗನಾಥ ರಾವ್

Click Here:
https://youtu.be/KzKRTFw4Eio

          ಜ್ಞಾನಾಳ ನೃತ್ಯ ಕ್ಷೇತ್ರದಲ್ಲಿ ಗುರುವಾಗಿ ಆಕೆಯನ್ನು ರಂಗದಲ್ಲಿ ಬೆಳೆಸುತ್ತಿರುವವರು ಹಿರಿಯ ನೃತ್ಯ ಗುರುಗಳಾದ ಶ್ರೀ ಬಾಲಕೃಷ್ಣ ಮಂಜೇಶ್ವರ ಇವರು. ಮಂಜೇಶ್ವರದ ನಾಟ್ಯನಿಲಯಂ ಸಂಸ್ಥೆಯ ವಿದ್ಯಾರ್ಥಿಯಾದ ಜ್ಞಾನಾಳಿಗೆ ಭರತನಾಟ್ಯ, ಕೂಚುಪುಡಿ, ಒಡಿಸ್ಸಿ, ಜಾನಪದ ನೃತ್ಯ, ಪಾಶ್ಚಾತ್ಯ ಶೈಲಿಯ ನೃತ್ಯ ಮೊದಲಾದ ನೃತ್ಯಪ್ರಕಾರಗಳು ಪಾದದೊಳಗೇ ಕಲೆತುಕೊಂಡಿದೆ. ಸಾಹಿತ್ಯ, ಸಂಗೀತ, ಕ್ರೀಡೆ ಮುಂತಾದ ವಿಭಾಗಗಳಲ್ಲೂ ಈಕೆಯ ಆಸಕ್ತಿಯ  ನಡೆ ಮೆಚ್ಚುವಂಥದ್ದು. ಇದುವರೆಗೆ ಸಾವಿರಕ್ಕೂ ಹೆಚ್ಚು ನೃತ್ಯ ಪ್ರದರ್ಶನಗಳೊಂದಿಗೆ ಸಾವಿರಕ್ಕೂ ಹೆಚ್ಚಿನ ಬಹುಮಾನಗಳನ್ನು ತನ್ನದಾಗಿಸಿಕೊಂಡಿರುವ ಈಕೆ ಬೆಂಗಳೂರಿನ ಡಿ.ಜೆ ಸ್ಟೂಡಿಯೋ ಹಮ್ಮಿಕೊಂಡಿದ್ದ "ಇಂಪಲ್ - 2012" ನೃತ್ಯಸ್ಪರ್ಧೆಯಲ್ಲಿ ವಿಜೇತೆಯಾಗಿ ಹೊರಹೊಮ್ಮಿದ್ದಾಳೆ. ದೂರದರ್ಶನ, ರೇಡಿಯೋಗಳಲ್ಲಿ ತನ್ನ ಕಾರ್ಯಕ್ರಮವನ್ನು ನೀಡಿದ ಈಕೆಯದು ಬಹು ನಯವಾದ ಮನಸ್ಸು. "ನಾನು ಈಗಷ್ಟೇ ನೃತ್ಯಕ್ಷೇತ್ರದಲ್ಲಿ ಚಿಗುರು. ಸಾಧಿಸಬೇಕಾದದ್ದು ಇನ್ನೂ ಬಹಳಷ್ಟಿದೆ. ಎಲ್ಲರ ಪ್ರೋತ್ಸಾಹ, ತಂದೆ-ತಾಯಿಯರ ಹಾಗೂ ಗುರುಗಳ ಪ್ರೀತಿ ಆಶೀರ್ವಾದಗಳು ನನ್ನ ಜೊತೆ ಇರುವಾಗ ಸಾಧಿಸಬೇಕು ಎಂಬ ಛಲವಿದೆ..." ಎಂದು ನುಡಿಯುವ ಜ್ಞಾನ ಈ ಮಾತುಗಳಿಂದಲೇ ತನ್ನ ಮನಸ್ಸು ಯಾವ ರೀತಿ ವಿನಯಪೂರ್ವಕವಾದುದು ಎಂಬುದನ್ನು ಸಮಾಜಮುಖಕ್ಕೆ ತೋರಿಸಿಕೊಡುತ್ತಾಳೆ. ಈ ಮಾತುಗಳನ್ನು ಸ್ವತಃ ಆಕೆಯೇ ನನ್ನ ಬಳಿಯಲ್ಲಿ ಹೇಳಿಕೊಂಡುದರಿಂದ ಬಹಳ ಹೆಮ್ಮೆಯಿಂದ ಇಲ್ಲಿ ಪದಜೋಡಿಸುತ್ತಿದ್ದೇನೆ.
         ಇನ್ನು ಈಕೆಯ ವಿದ್ಯಾಭ್ಯಾಸದ ಕುರಿತು ಹೇಳುವುದಾದರೆ ಪ್ರತಿಭಾವಂತ ವಿದ್ಯಾರ್ಥಿನಿಯಾಗಿ ಓದಿನಲ್ಲೂ ತಾನು ಮುಂದಿದ್ದೇನೆ ಎನ್ನುವುದನ್ನು ಸಾಬೀತು ಪಡಿಸಿದ್ದಾಳೆ. ತನ್ನ ಪ್ರಾಥಮಿಕ ಹಂತದ ಶಿಕ್ಷಣವನ್ನು ಮಂಗಳೂರಿನ ಕೆನರಾ ಇಂಗ್ಲೀಷ್ ಮೀಡಿಯಂ ಶಾಲೆಯಲ್ಲಿ ಪೂರ್ಣಗೊಳಿಸಿ, ಪ್ರೌಢ ಶಿಕ್ಷಣವನ್ನು ಕೆನರಾ ಸಿ.ಬಿ.ಎಸ್.ಇ ಪ್ರೌಢಶಾಲೆಯಲ್ಲಿ ವಿಶಿಷ್ಟ ಶ್ರೇಣಿಯೊಂದಿಗೆ ಉತ್ತೀರ್ಣಳಾಗಿದ್ದಾಳೆ. ಪ್ರಸಕ್ತ ವರ್ಷ 2017ರಲ್ಲಿ ಈಕೆ ಕೇಂದ್ರ ಪ್ರೌಢಶಿಕ್ಷಣ ಮಂಡಳಿ(C.B.S.E)ಯ 10ನೇ ತರಗತಿಯ ಅಂತಿಮ ಪರೀಕ್ಷೆಯಲ್ಲಿ 10ಕ್ಕೆ 10 ಸಿ.ಜಿ.ಪಿ.ಎ ಅಂಕಗಳನ್ನು ಗಳಿಸುವುದರ ಮುಖೇನ ಪಠ್ಯೇತರ ಚಟುವಟಿಕೆಗಳಲ್ಲಿ ಮಾತ್ರವಲ್ಲ, ಪಠ್ಯಪೂರಕ ಚಟುವಟಿಕೆಗಳಲ್ಲೂ ತಾನು ಒಳ್ಳೆಯ ರೀತಿಯ ಕಾರ್ಯವನ್ನು ಎಸಗಿದ್ದೇನೆ ಎಂಬುದನ್ನು ತೋರಿಸಿಕೊಟ್ಟಿದ್ದಾಳೆ. ಇದೀಗ ಈಕೆ ಕೆನರಾ ಪದವಿ ಪೂರ್ವ ಕಾಲೇಜಿನಲ್ಲಿ ವಿಜ್ಞಾನ ವಿಷಯ (PCMS) ವನ್ನು ಅಭ್ಯಸಿಸುತ್ತಿದ್ದು ಕಲಿಕೆಯೊಂದಿಗೆ ನಿರಂತರ ಕಲಾಸೇವೆಯಲ್ಲಿ ತನ್ನನ್ನು ತಾನು ಬಹು ಉತ್ಸಾಹದಿಂದ ತೊಡಗಿಸಿಕೊಂಡಿದ್ದಾಳೆ.

         ಸಣ್ಣ ವಯಸ್ಸಿನಲ್ಲಿಯೇ ತನ್ನನ್ನು ತಾನು ನೃತ್ಯದಲ್ಲಿ ತೊಡಗಿಸಿಕೊಂಡ ಕಾರಣ ಇದೀಗ ಈಕೆ ತನ್ನದೇ ಆದ ಒಂದು ನೃತ್ಯ ತಂಡವೊಂದನ್ನು ರೂಪಿಸಿ, ಬೆಳೆಸುವ ಮಟ್ಟಿಗೆ ಬಂದು ತಲುಪಿದ್ದಾಳೆ. ತನ್ನ ಸಹವರ್ತಿಗಳನ್ನು ಜೊತೆಗೂಡಿಸಿಕೊಂಡು, ತಂದೆ-ತಾಯಿಯರ ಮಾರ್ಗದರ್ಶನದಲ್ಲಿ "ಹೆಜ್ಜೆನಾದ" ಎಂಬ ನೃತ್ಯ ಮತ್ತು ಸಂಗೀತ ತಂಡವು ಈಕೆಯ ಮುಂದಾಳುತ್ವದಲ್ಲಿ ಸಂಪನ್ನಗೊಳ್ಳುತ್ತಿದ್ದು ಈವರೆಗೆ ರಾಜ್ಯ ಹಾಗೂ ದೇಶದ ಹಲವು ಭಾಗಗಳಲ್ಲಿ ಈ ತಂಡದ ಮುಖೇನ ನೃತ್ಯ-ಸಂಗೀತ ಕಾರ್ಯಕ್ರಮಗಳನ್ನು ನೀಡುತ್ತಾ ಬಂದಿದ್ದಾಳೆ. ಸುಮಾರು 200ಕ್ಕೂ ಹೆಚ್ಚಿಗೆ ನೃತ್ಯ ನಿಯೋಜನೆಯನ್ನು ಮಾಡಿದ್ದು ಇದುವರೆಗೆ ಆಳ್ವಾಸ್ ನುಡಿಸಿರಿ, ಮಂಗಳೂರು ದಸರಾ ಉತ್ಸವ, ಲಕ್ಕುಂಡಿ ಉತ್ಸವ, ಗಣೇಶೋತ್ಸವ ಹಾಗೂ ನವರಾತ್ರಿ ಉತ್ಸವ, ಗದಗ ಸಾಹಿತ್ಯ ಸಮ್ಮೇಳನ ಹಾಗು ಇನ್ನೂ ಹಲವೆಡೆಗಳಲ್ಲಿ ತನ್ನ ತಂಡದೊಂದಿಗೆ ಉತ್ತಮ ಪ್ರದರ್ಶನಗಳನ್ನು ನೀಡಿ ಪ್ರೇಕ್ಷಕರ ಮನಗೆದ್ದಿದ್ದಾಳೆ. ಈ ರೀತಿ ಎಳವೆಯಿಂದಲೇ ಸಾಧನೆಯ ಮೆಟ್ಟಿಲುಗಳನ್ನು ಹತ್ತುತ್ತಿರುವ ಜ್ಞಾನಾಳಿಗೆ ಆಕೆಯ ಪ್ರತಿಭೆಯ ನೆಲೆಯಲ್ಲಿ ಹಲವಾರು ಪ್ರಶಸ್ತಿ-ಸನ್ಮಾನಗಳು ಒದಗಿಬಂದಿವೆ.

• 2008ರ ಕುಣಿಯೋಣು ಬಾರ ರಿಯಾಲಿಟಿ ಶೋನಲ್ಲಿ ಪ್ರಥಮ ಸ್ಥಾನ.
• 2007ರಲ್ಲಿ ಬೆಂಗಳೂರಿನಲ್ಲಿ "ವಿಶ್ವಕಲಾರತ್ನ" ಪ್ರಶಸ್ತಿ.
• 2009ರಲ್ಲಿ ದಕ್ಷಿಣ ಕನ್ನಡ ಜಿಲ್ಲಾ ರಾಜ್ಯೋತ್ಸವ ಪ್ರತಿಭಾ ಪುರಸ್ಕಾರ.
• 2010ರಲ್ಲಿ ಎಂ.ಎಂ.ಸಿ.ಎ ಯಿಂದ ಕೊಡಮಾಡಲ್ಪಟ್ಟ "ಕಲಾರತ್ನ" ಪ್ರಶಸ್ತಿ.
• 2008, 2009, 2010 ರಲ್ಲಿ ಎಂ.ಎಂ.ಸಿ.ಎ ಇಂದ ಸತತ ಮೂರು ಬಾರಿ "ಉತ್ತಮ ನೃತ್ಯಗಾರ್ತಿ" ಪ್ರಶಸ್ತಿ.
• 2010 ಹಾಗೂ 2012 ರಲ್ಲಿ ಮಂಗಳೂರು ರೋಟರಿ ಕ್ಲಬ್ ವತಿಯಿಂದ "ಯುವ ಸಾಧಕಿ" ಪ್ರಶಸ್ತಿ.
• 2011ರಲ್ಲಿ "ನೃತ್ಯರತ್ನ" ಪ್ರಶಸ್ತಿ.
• 2011ರಲ್ಲಿ ಕರ್ನಾಟಕ ಬಾಲಭವನ ಸೊಸೈಟಿಯಿಂದ  ಕೊಡಮಾಡಿದ "ಬಾಲ ಪ್ರತಿಭಾಶ್ರೀ" ಪ್ರಶಸ್ತಿ.

ಹೀಗೆ ಹತ್ತು ಹಲವು ಪ್ರಶಸ್ತಿಗಳು ಜ್ಞಾನಾಳ ಮಡಿಲು ಸೇರಿವೆ. ಇವಿಷ್ಟು ಆಕೆಯ ಸಾಧನೆಯ ಹಾದಿಯ ಬಗೆಗೆ ಒಂದಿಷ್ಟು.


         ಪರಿಶ್ರಮವೊಂದೇ ಸಾಧನೆಯ ಶಿಖರವನ್ನು ಏರಲು ಸಹಕಾರಿಯಾದ ಮಾರ್ಗವಾಗಿದೆ. ಕೇವಲ ಕ್ಷಣಿಕ ಕಾಲದಲ್ಲಿ ಸಾಧನೆ ಎಂಬುದು ವ್ಯಕ್ತಿಯ ಮುಡಿಗೇರುವುದಿಲ್ಲ. ಅದಕ್ಕೆ ಧೀರ್ಘ ಕಾಲದ ತಪಸ್ಸು ಬೇಕಾಗುತ್ತದೆ. ಆ ರೀತಿ ತಪಸ್ಸು ಮಾಡಲು ಅಷ್ಟೇ ಮುಖ್ಯವಾಗಿ ಏಕಾಗ್ರತೆ ಎಂಬುದು ಬೇಕಾಗುತ್ತದೆ. ಆ ಏಕಾಗ್ರತೆ ಎಂಬುದನ್ನು ಪಡೆಯಲು ಶ್ರದ್ಧೆ ಎಂಬುದು ಬೇಕಾಗುತ್ತದೆ. ಈ ಶ್ರದ್ಧೆ ನಮ್ಮಲ್ಲಿ ಮೂಡಬೇಕಾದರೆ ನಮ್ಮ ಮನಸ್ಸು ಆ ದಾರಿಯಲ್ಲಿ ನಡೆಯಬೇಕಾಗುತ್ತದೆ. ಮನಸ್ಸು ಆ ದಾರಿಯಲ್ಲಿ ನಡೆಯಬೇಕಾದರೆ ಇಂದ್ರಿಯಗಳನ್ನು ತನ್ನೊಂದಿಗೆ ನಡೆಸಬೇಕಾಗುತ್ತದೆ. ಇಷ್ಟೆಲ್ಲಾ ಹಂತಗಳನ್ನು ದಾಟಿದ ಒಬ್ಬ ಸಾಧಕನ ಮುಂದೆ ಇನ್ನೂ ಅನಂತವಾದಂತಹ ವ್ಯಾಪ್ತಿ ಕಣ್ಣೆದುರು ತೋರುತ್ತದೆ ಎಂದಾದರೆ ನಾವು ಅರಿಯಬೇಕಾದುದು ಇಷ್ಟೇ- 'ಸಾಧನೆ ಎಂಬುದು ನಿತ್ಯ ನಿರಂತರ. ಎಷ್ಟು ಸಾಧಿಸಿದರೂ ಸಾಧಿಸದೇ ಉಳಿವುದು ಅನಂತಕ್ಕಿಂತಲೂ ಮಿಗಲು'. ಆ ದಾರಿಯಲ್ಲಿ ಸ್ವಲ್ಪ ದೂರ ಕ್ರಮಿಸಿದರೂ ಮನುಷ್ಯರಾದ ನಾವುಗಳು ಆ ಬಗೆಗೆ ಹೆಮ್ಮೆಯಿರಿಸಬೇಕು. ಇದೇ ರೀತಿ ಸಾಧನೆಯ ಹಾದಿಯಲ್ಲಿ ನಡೆಯುತ್ತಿರುವ ನಮ್ಮ ಕರಾವಳಿಯ ಕೂಸು ಕುಮಾರಿ ಜ್ಞಾನ ಐತಾಳ್... ಈಕೆಯ ಬಗೆಗೆ ಒಂದಿಷ್ಟನ್ನು ಬರೆಯುವ ಪ್ರಯತ್ನವನ್ನು ಇಲ್ಲಿ ಮಾಡಲಾಗಿದೆ. ಆಕೆಯ ವಿವಿಧ ನೃತ್ಯ ಕಾರ್ಯಕ್ರಮಗಳ ಚಿತ್ರಗಳನ್ನು ಓದುಗರು ಇಲ್ಲಿ ವೀಕ್ಷಿಸಬಹುದು. ಅಲ್ಲದೇ ಆಕೆಯ ಕೆಲವೊಂದು ನೃತ್ಯಪ್ರದರ್ಶನಗಳ ವೀಡಿಯೋ ತುಣುಕುಗಳ ಕೊಂಡಿಯನ್ನು ಇಲ್ಲಿ ಹಾಕಲಾಗಿದ್ದು ಕಲಾಸಕ್ತರು ನೋಡಿ ತಮ್ಮ ಅಭಿಪ್ರಾಯಗಳನ್ನು ತಿಳಿಸಿ. ಪ್ರತಿಭಾ ಕುವರಿಯನ್ನು ಪ್ರೋತ್ಸಾಹಿಸಿ ಎಂಬುದು ಈ ಲೇಖನದ ಆಶಯ.


         'ಬೆಳೆಯುವ ಸಿರಿ ಮೊಳಕೆಯಲ್ಲಿ' ಎಂಬ ಗಾದೆ ಮಾತಿನಂತೆ ಈಕೆಯ ಬೆಳವಣಿಗೆಯ ಗತಿ ಇದೇ ರೀತಿ ಸಾಗುತ್ತಾ ಇರಲಿ ಎಂಬುವುದು ನಮ್ಮ ಆಶಯ. ಈಗಷ್ಟೇ ಪ್ರೌಢ ಶಿಕ್ಷಣವನ್ನು ಪೂರೈಸಿ ಪದವಿ ಪೂರ್ವ ಶಿಕ್ಷಣಕ್ಕೆ ಕಾಲಿರಿಸಿದ ಈಕೆಗೆ ಇನ್ನೂ ಅನೇಕ ಅವಕಾಶಗಳು ಒದಗಿ ಬಂದು ಮುಂದೆ ನಮ್ಮ ನಾಡಿನ ಕೀರ್ತಿಯನ್ನು ಬೆಳಗುವಲ್ಲಿ ಈಕೆಯ ಪಾತ್ರ ಮಹತ್ವದ್ದಾಗಲಿ ಎಂದು ಹಾರೈಸುತ್ತೇನೆ. ಇಷ್ಟು ಚೆಂದದಲ್ಲಿ ಪ್ರೋತ್ಸಾಹವಿತ್ತು ಈಕೆಯ ಪ್ರತಿಭೆಯನ್ನು ಹೊರತರುವಲ್ಲಿ ಪ್ರಮುಖ ಪಾತ್ರವಹಿಸಿದ ಈಕೆಯ ಹೆತ್ತವರನ್ನೂ, ಗುರುಗಳನ್ನೂ ಈ ಸಂದರ್ಭದಲ್ಲಿ ಅಭಿನಂದಿಸುತ್ತಿದ್ದೇನೆ. ಸಾಧನೆಯ ಹಾದಿಯಲ್ಲಿ ಈಕೆಯ ಪಯಣ ನಿರಂತರ ಸುಖಮಯವಾಗಲಿ, ಅಡೆತಡೆಗಳನ್ನು ಮೀರಿ ನಿಲ್ಲುವ ಶಕ್ತಿ ಈಕೆಗೊದಗಲಿ, ಹೆತ್ತವರ ಕಣ್ಣುಗಳಲ್ಲಿ ಬೆಳಕು ಚೆಲ್ಲುವ ಹೊಳಪು ಈಕೆಯ ವದನವನ್ನು ಸೇರಲಿ ಎಂಬ ಪ್ರೀತಿಪೂರ್ವಕ ಹಾರೈಕೆಗಳೊಂದಿಗೆ...
                                                                                                                                 -ಶ್ರೀಸುತ