ಭಾವಗೀತೆ ೭ - ಪ್ರೀತಿಧಾರೆ

ಪ್ರೀತಿಧಾರೆಯೆರೆದ ಹೂವೆ
ಮಧುರವಾಗಿ ನೆನೆಯುವೆ
ಮನದಿ ಬರೆದ ಗೀತೆಯನ್ನು
ರಾಗವಾಗಿ ಹಾಡುವೆ ||ಪ||

ಭಾವತುಂಬಿ ಮನದ ಹಕ್ಕಿ
ರೆಕ್ಕೆ ಬಿಚ್ಚಿ ನಲಿಯಿತು
ನಿನ್ನ ನಗುವ ನೋಡುತಲೇ
ಮೇಲೆ ಮೇಲೆ ಹಾರಿತು ||೧||

ಕಡಲ ತೆರೆಗೆ ಮೈಯನೊಡ್ಡಿ
ನಿನ್ನ ಒಲವನರಸಿದೆ
ಮನದಿ ಬರೆದ ಗೀತೆಯನ್ನು
ಏಕೆ ಹೀಗೆ ಒರೆಸಿದೆ ||೨||

ಉರುಳಿ ಹೋಗುತಿರುವ ಕಾಲ
ಹಿಡದು ನಾನು ಕುಳಿತಿಹೆ
ನನ್ನ ಹೃದಯವನ್ನು ಒಡೆದು
ಎತ್ತ ಕಡೆಗೆ ಸಾಗಿಹೆ ||೩||

ಏರಿ ಹೋದ ಪ್ರೀತಿ ಹಕ್ಕಿ
ರೆಕ್ಕೆ ಮುಚ್ಚಿ ಕುಸಿಯಿತು
ಮೌನವಾಗಿ ಮೈಯ ಮುದುಡಿ
ಬೇನೆಯನ್ನು ಸಹಿಸಿತು ||೪||

ಬಣ್ಣಬಣ್ಣದಾಟಗಳಿಗೆ
ಮನವು ಸೋತು ಹೋಯಿತು
ಕಣ್ಣ ತೆರೆದು ನೋಡುವಾಗ
ಎಲ್ಲಾ ಮಾಯವಾಯಿತು ||೫||

                                 -ಶ್ರೀಸುತ

■ ದಿವಾಣ ದುರ್ಗಾಪ್ರಸಾದ್ ಭಟ್ ಕಟೀಲು

Photo Credit: wallpapersjpg.com

ಭಾವಗೀತೆ ೬ - "ಜೀವವೀಣೆ"ಯನ್ನು ಓದಲು ಭಾವಗೀತೆ ೬  ಕ್ಲಿಕ್ ಮಾಡಿ.