ಹುಡುಕಾಟ


ಚಿತ್ರಕವನ ೨:

ಎಲ್ಲಿ ಹುಡುಕಲಿ ನನ್ನ
ಅಮ್ಮನನು ನಾನಿಂದು
ಇರುಳ ಹಗಲಾಗಿಸುವ
ಈ ಸಂತೆಯೊಳಗೆ

ತೊರೆದು ಹೋಗಿಹಳು
ನನ್ನಮ್ಮ ನನ್ನನು
ಹೊಸ ಕನಸುಗಳ
ಹುಡುಕಲೆಂದೇ

ಬಾಳೆಂಬ ಸಂತೆಯಲಿ
ಬದುಕ ಹೊಸೆಯಲು ತಾತ
ಸಂತೆ ಸಂತೆಯ ತಿರುಗಿ
ಸಾಗುತಿರಲು

ಕನಸುಕಂಗಳ ಅಮ್ಮ
ಹುಡುಕಿದಳು ಕನಸುಗಳ
ಅರಿವಿಲ್ಲದ ಹದಿಹರೆಯದಲ್ಲಿ

ಹಿಂದುಮುಂದನರಿಯದೆ
ತನುಮನವನೊಪ್ಪಿಸಲು
ಹೊಸಕಿಹೋಯಿತಮ್ಮನ
ಚೆಲುವ ಬದುಕು

ಧರೆಗಳಿದೆನು ನಾನು
ಕನಸುಗಳ ದಾರವನು
ಕಡಿದೆಸೆದು ಕ್ರೂರನಂತೆ

ಮುಗ್ಧ ಮನವನು ಅಮ್ಮ
ಅರಿಯಲಾರದೆ ಅಂದು
ತೊರೆದು ಹೋದಳು ನನ್ನ
ಮರೆತು ಚಿಂತೆ

ಅಪ್ಪ ಬಿಟ್ಟಿಹ ಮಗುವು
ಅಮ್ಮ ಎಸೆದಿಹ ಶಿಶುವು
ಮರಳಿ ಸಂತೆಯ ನಡುವೆ ಬಂದೆ

ತಾತನ ವಾತ್ಸಲ್ಯ ಧಾರೆಯಲಿ
ತೋಯುತಲಿ ಮಮತೆಯ
ಮಡಿಲಿನ ಸಿಹಿಯ ಸವಿದೆ

ಹೆಪ್ಪುಗಟ್ಟಿದ ನೋವ
ಎದೆಯಲಿರಿಸುತ ತಾತ
ನನಗಾಗಿ ನಗುವನು
ಕಹಿಯ ಮರೆತು

ಆಟಿಕೆಯ ನೀಡುತಲಿ
ಆಟವನು ನೋಡುತಲಿ
ಹುಡುಕುವನು ನನ್ನಲಿ
ತನ್ನ ಬಾಳ ಕನಸು

ಕನಸ ನನಸಾಗಿಸುವೆ ನಾ
ತಾತನ ಕಣ್ಣೊರೆಸಿ
ಕೃತಕ ಬೆಳಕೀವ ಈ
ಸಂತೆ ದಾಟಿ

ಸಹಜತೆಯ ಬೆಳಕಿನಲಿ
ಬದುಕನ್ನು ಹೊಸೆಯುವೆನು
ಬಂದ ಬವಣೆಗಳನೆಲ್ಲ
ಬದಿಗೆ ನೂಕಿ

                            -ಪ್ರಸನ್ನಾ ವಿ ಚೆಕ್ಕೆಮನೆ


Author image
About the Author
ಹೆಸರು:ಶ್ರೀಮತಿ ಪ್ರಸನ್ನಾ ವಿ ಚೆಕ್ಕೆಮನೆ.
▪ಶ್ರೀಮತಿ ಪ್ರಸನ್ನಾ ವಿ ಚೆಕ್ಕೆಮನೆ ಇವರು ಕೇರಳದ ಕಾಸರಗೋಡು ಜಿಲ್ಲೆಯ ಧರ್ಮತ್ತಡ್ಕದಲ್ಲಿ ವಾಸವಾಗಿದ್ದು ಕನ್ನಡ, ಮಲಯಾಳಮ್, ಹವಿಗನ್ನಡ ಭಾಷೆಗಳಲ್ಲಿ ಸಾಹಿತ್ಯ ಕೃಷಿ ಮಾಡಿದವರು. ಗೃಹಿಣಿಯಾಗಿ ಮನೆಯಂಗಳವನ್ನು, ಬರಹಗಾರ್ತಿಯಾಗಿ ಮನದಂಗಳವನ್ನು ಬೆಳಗಿಸಿದ ಇವರು ತಮ್ಮದೇ ಶೈಲಿಯ ಬರವಣಿಗೆಯಲ್ಲಿ ಸಾಗುತ್ತಿದ್ದಾರೆ. 2014ರಲ್ಲಿ ಕನ್ನಡ ಪುಸ್ತಕ ಪ್ರಾಧಿಕಾರ ಇದರ ಸಹಕಾರದೊಂದಿಗೆ "ಇನಿದನಿ" ಎಂಬ ಕವನ ಸಂಕಲನವನ್ನು ಹೊರತಂದಿದ್ದಾರೆ. ಅಲ್ಲದೇ ಇವರು ಬರೆದ "ನನ್ನ ಕೃಷಿ" ಎಂಬ ಕವನವು ಕೇರಳ ಸರಕಾರದ ಎರಡನೇ ತರಗತಿಯ ಕನ್ನಡ ಪಠ್ಯಪುಸ್ತಕಕ್ಕೆ ಆಯ್ಕೆಯಾಗಿರುವುದು ಇವರ ಸಾಹಿತ್ಯ ಜಾತ್ರೆಗೊಂದು ಮೆರುಗು. 2010ರಲ್ಲಿ ಕೊಡಗಿನ ಗೌರಮ್ಮ ಸ್ಮಾರಕ ಕಥಾ ಸ್ಪರ್ಧೆಯಲ್ಲಿ ದ್ವಿತೀಯ ಬಹುಮಾನ, 2012ರಲ್ಲಿ ಒಪ್ಪಣ್ಣ.ಕಾಮ್ ನ ಕಥಾಸ್ಪರ್ಧೆಯಲ್ಲಿ ದ್ವಿತೀಯ ಬಹುಮಾನ, ಕರಾವಳಿ ಸಾಂಸ್ಕೃತಿಕ ಪ್ರತಿಷ್ಠಾನದ ಚುಟುಕು ಕಥಾ ಸ್ಪರ್ಧೆಯಲ್ಲಿ ದ್ವಿತೀಯ ಬಹುಮಾನ, ಕೊಡಗಿನ ಗೌರಮ್ಮ ಕಥಾ ಸ್ಪರ್ಧೆಯಲ್ಲಿ 2014ರಲ್ಲಿ ತೃತೀಯ ಹಾಗೂ 2015ರಲ್ಲಿ ಪ್ರಥಮ ಬಹುಮಾನಗಳನ್ನು ಬಾಚಿಕೊಂಡಿದ್ದಾರೆ. ಇವರ ಹಲವಾರು ಲೇಖನಗಳು, ಕಥೆ-ಕವಿತೆಗಳು ಉದಯವಾಣಿ, ಹೊಸದಿಗಂತ, ವಿಜಯ ಕರ್ನಾಟಕ, ಮಂಜುವಾಣಿ, ಕನ್ನಡ ಕೈರಳಿ, ಬಾಲಮಂಗಳ, ಮಂಗಳ ಮೊದಲಾದ ಪತ್ರಿಕೆಗಳಲ್ಲಿ ಪ್ರಕಟಗೊಂಡಿವೆ. ಇವರ ಕಥೆ-ಲೇಖನ ಹಾಗೂ ಕವಿತೆಗಳನ್ನು ನಮ್ಮ ಜಾಲತಾಣದಲ್ಲಿ ಓದಬಹುದು.

Please share and support me

4 comments:

  1. ಶ್ರೀಕೃಷ್ಣ ಶರ್ಮ ಹಳೆಮನೆ.
    ತಂದೆ ತಾಯಿಯ ಪ್ರೀತಿ,ಮಮತೆಯಿಂದ ವಂಚಿತನಾದ ಮಗುವಿಗೆ ಅಜ್ಜನ ಆಸರೆ. ಮಗುವಿನ ಮನಸ್ಸಿನ ಭಾವನೆಗಳು ಕವನದಲ್ಲಿ ಉತ್ತಮವಾಗಿ ಮೂಡಿ ಬಂದಿದೆ
    sksharmah07@gmail.com

    ReplyDelete
    Replies
    1. ಧನ್ಯವಾದಗಳು... ಲೇಖಕರ ಬಗೆಗಿನ ಪ್ರೋತ್ಸಾಹದ ನುಡಿಗಳಿಗೆ.

      Delete

ನಿಮ್ಮ ಅನಿಸಿಕೆಗಳು ಅತ್ಯಮೂಲ್ಯವಾಗಿದ್ದು ಅಭಿಪ್ರಾಯಗಳನ್ನು Comment Box ನಲ್ಲಿ ಬರೆದು ಪ್ರೋತ್ಸಾಹಿಸಿ. Do not spam.